Bülbülün Ev-Muzeyi

Azərbaycan professional vokal sənətinin banisi Bülbül musiqi sənətimizin inkişafı tarixində bütöv bir dövrdür.

Erməni vəhşiləri tərəfindən darmadağın edilmiş Bülbülün Şuşadakı ev-muzeyi hal-hazırda interyer və qrafik dizayn üzrə bərpa işlərindən sonra ziyarətçilərin ixtiyarına verilmişdir.

Muzeyin girişində Bülbülün xatirəsini əbədiləşdirən fotostendlər nümayiş etdirilir. Eksponatların əksəriyyəti Bülbülün uşaqlıq illərindən bəhs edən şəkillər, onun qavalı və digər musiqi alətləri, yaradıcılıq həyatındakı dəyişikliklərdən bəhs edən sənədlər, iştirak etdiyi opera tamaşalarının və konsertlərin afişaları, tamaşalarından səhnələri əks etdirən şəkillərdən ibarətdir. Fotoşəkillərlə yanaşı, burada Bülbülün çoxillik səmərəli yaradıcı işini təsdiq edən əlyazmaları, dərc edilmiş məqalə və məruzələri də sərgilənir.